موضوع شامل عن كيفية الاعتناء بالسلحفاة

- لو هتعملولها بيت ببحيرة صغيرة و دا بيبقى جميل اوى زى الصور دى ابقوا حطوا فى المية شوية من سائل الديتول لمدة يومين فى الاسبوع و تغيروا المية بعد ما هى تنزل فيها ب نص ساعة , دا بالنسبة للبكتيريا.

- اما بالنسبة للاكل فالخضار الطازة و اهم اهم اهم اهم حاجة , يتغسل كويس جداً كذا مرة و ياريت بمية مخفف فيها شوية سائل ديتول و بعدين يتشطف كويس جداً لان اكتر الامراض اللى بتقتل السلاحف بتجيلها من الخس او الخضار الملوث او المسموم بالمبيد او الرش .

- مياة الشرب , السلاحف مش محتاجة مياة شرب لو بتقديمولها خس للاكل , لان الخس بيبقى فيه المية اللى هيا محتاجاها , لكن ممكن تحطوا طبق صغير لو مش عاملينلها حوض زى الصور .

1 - الاضاءة :

زى ما انتوا ملاحظين فى اول صورة ان السلاحف ملمومة تحت اللمبة علشان الدفء و النور .

2 - الكهوف :

لابد من وضع بعض الكهوف متباعده بشكل مناسب , و وضع واحد اخر تحت الماء و متقلقوش على التنفس السلحفة بتصرف نفسها , و تقدر تعد فى الكهف اللى تحت المية دا كتيييييير اوى , ممكن تعملوا كهوف سهلة باصارى الزرع اليلاستيكية ( جمع اصرية او اصيص) و يستحسن الفخارية او بالحجارة او الاخشاب المتحجرة و الحاجات دى هتلقوها عند بائعين مستلزمات احواض السمك .

3 - الزرع الطبيعى :

لو انكو زرعتو زرع طبيعى كثييير الاوراق و بينموا بسرعة ( انواع معينة ) و فى نفس الوقت مناسب للسلحفاة كأكل , فى الحالة دى مش هتحتاجوا انكو تجيبولها اى اكل , لانها هتلاكل من الزرع و هوا هيكبر و يزيد و هاكذا , اهم حاجة تراعوا الزرع فى المية و الاضاءة (حسب نوع الزرع و مكان البيت - بتاع السلحفة طبعا - , يوجد نباتات ظل و نباتات شمس , و الاختيار بيكون على اساس البيت هيبقى موجود فى الظل ولا فى الشمس ) و خدوا بالكوا ان الزرع لو عاوزين السلاحف تعتمد عليه كغذاء لازم يكون مناسب ليها مش صبار مثلاً جربوا تزرعوا خس .

4 - البحيرة :

البحيرة الصناعية من اجمل ما يمكن ان يوضع فى بيوت السلاحف بانواعها , اهم حاجة يجب مراعاتها فى البحيرة هو تنقية المياة بوضع فيلتر كهربائى مثل الذى يوضع فى احواض السمك , يستحسن يكون خارجى , و يا ريت المية تتغير كل فترة لكن مش من الحنفية , اركنوا كمية مناسبة من المياة و اتركوهم يومين حتى يطير منهم الكلور و بعدين غيروا المية . و مرة او مرتين فى الاسبوع حطوا فى المية سائل الديتول بالنسب اللى مكتوبه على العلبة و خلوا السلحفة تستحما فيها , و بعدين غيروا المية .